Lehia estua dute KAE 1 ligako eskualdeko traineruek

Getariako trainerua ziaboga ematen. (Getariako Arraun Elkartea) Emakumezkoen Gipuzkoako Traineru Ligako eta KAE 1 ligako arraun taldeek bina estropada jokatu dituzte asteburuan. Lehen hitzordua Portugaleten (Bizkaia) izan zuten gizonezkoek, larunbatean. Donostiarra nagusitu zen norgehiagokan, eta Zumaiako trainerua (20:08.77) hirugarren sailkatu zen, Santurtziren atzetik; bosgarrena izan zen Getaria (20:22,69), zazpigarrena Zarautz (20:38,72), eta hamabigarrena iritsi zen Orioko bigarren trainerua (20:38,72). Igandean, Getarian jokatu zuten estropada, eta Donostiarrak irabazi zuen bandera; eskualdeko taldeen artean, Zumaiako Telmo Deun izan zen azkarrena, 22:02,32 denbora behar izan zuen estropada amaitzeko. Ontzi hori bosgarren sailkatu zen, baina oso gertu izan zuen seigarren iritsi zen Zarautz, 33 ehunenekogatik hartu zion aurrea. Ligako lehen estropadaren harira, ZAEko batzordeko kide Gaizka Garmendiak aipatu zuen moduan, «lehia polita» dago eskudealdeko ontzien artean, oso parekatuta daudelako; denboraldian zehar norgehiagoka estuak ikusteko aukera izango dute arraunzaleek. Igandean, Zumaia bosgarrena izan zen, Zarautz seigarrena, Orio B (22:11,14) zazpigarrena eta Getaria zortzigarrena (22:17,07). KAE 1 ligako sailkapen nagusiari dagokionean, Zumaia laugarren postuan kokatu da 25 punturekin, eta ohorezko txandan ari da lehian Donostiarra, Santurtzi eta Lekeitiorekin batera. Dena dela, gertu du Zarauzko trainerua, 23 punturekin sailkapenean bosgarrena dago. Hurrengo estropada larunbatean jokatuko dute, Zumaian. Oriokoak bigarren Emakumezkoen Gipuzkoako Traineru Ligako bi estropada jokatu dituzte asteburuan, Pasai Donibanen (Gipuzkoa) lehena eta Portugaleten (Bizkaia) bigarrena. Onenekin lehian aritzeko gai dela erakutsi zuen igandean Orioko emakumezkoen traineruak, Hibaikari aurrea hartuta bigarren sailkatu ziren Pasaian. Euskotren Ligaren sailkapen faserako bi aste eskas falta direnean, albiste ona da bigarren postu hori Orio Arraunketa Elkartekoentzat.