Gaur goizean Zumaiako lapurreten inguruan hedabide batean zabaldu den informazioaren harira, eta horrek herrian eta herritarren artean sor ditzaken kezka eta urduritasuna aintzat hartuta, Zumaiako Udalak argi utzi du emandako datuak "ez direla guztiz zuzenak".
Batetik, urtea hasi denetik herrian gertatutako lapurretak ugaritu egin direla ziurtatu du udala. Baina azaldu duenez, kopuru hori "ez dator bat, inondik inora, gaur zabaldutakoarekin". Urtarriletik gaur arte erregistratu diren datuen arabera, guztira 8 lapurreta gertatu dira, zabaldu den kopuruaren erdia, alegia.
Bestetik, lapurretak Aita Marin, Basadin, Patxita Etxezarretan eta Juan Belmonten gertatu direla adierazi du, eta ez Ardantzabiden, hedabidean esan den bezala.
Dena den, udalak datuak "ukaezinak" direla eta "gertatutakoari garrantzirik kentzen" ez diola azaldu du. Horregatik, lapurreta horien guztien aurrean beharrezkoak diren neurriak hartu dituela azpimarratu du. Dagoeneko ertzainen esku dago kasuen azterketa eta bien bitartean, udalak "lasaitasun mezua" helarazi die herritarrei gaiaren aurrean.