Hausnarketa puzgarriak

Tom Sharperen Wilt eleberriaren antzerkirako egokitzapenarekin  abiatuko da Zumaiako antzerki denboraldia. Ados Teatroak Wilt, panpina puzgarriaren hilketa antzezlan eroa taularatuko du ostiralean, 22:00etan, Aita Mari aretoan. Zuzentasun eta konbentzionalismo oro barregarri uzten duen istorio bizia da, umore garbi eta zorrotzez kontatua. Ikuskizun dibertigarria, garratza eta entretenigarria, eta hausnarketarako bide ematen duena. Wilt (Mikel Laskurain) literatura irakasle frustratua da. Afari batera gonbidatuko dute, eta bertan panpin puzgarri batekin harrapatuko dute ezustean. Gertakariaren ondorioz, emazteak etxetik alde egiten du, eta Wiltek hura hiltzeaz amesten hasten da. Hainbat zentzugabekeriak emaztearen desagerpenaren susmagarri bihurtuko dute, eta poliziaren (Isidoro Fernandez) galdeketak jasan beharko ditu. Antzezlaneko aktore taldea Aitziber Garmendiak, Miren Gojenolak eta Koldo Losadak osatuko dute. Ados Teatroaren proposamenaren ondotik, beste bost antzezlan eskainiko dituzte urte amaiera bitartean. Alde batetik, helduentzako Publikoari gorroto eta Goenkale telesailaren antzerki moldaketa; eta bestetik, Katillukadak, Déjà Vu Zirkoa eta Murren bidaia haur antzerkiak. ---------------------------- Zumaiako antzerki egutegia Urriak 5, ostirala 22:00etan. Aita Mari aretoan, Ados Teatroaren Wilt, panpina puzgarriaren hilketa. Urriak 28, igandea 12:00etan. Aita Mari aretoan, Kontakatillu antzerki taldearen Katillukadak. Azaroak 16, ostirala 22:00etan. Aita Mari aretoan, Huts Teatroaren Publikoari gorroto. Azaroak 18, igandea 12:00etan. Aita Mari aretoan, La Bardufa taldearen Déjà Vu Zirkoa. Abenduak 14, ostirala 22:00etan. Aita Mari aretoan, Pausoka eta Glu Glu ekoizpen etxeen Goenkale. Abenduak 16, igandea 12:00etan. Aita Mari aretoan, Behibi’s antzerki taldearen Murren bidaia.