Etzi hasiko dira sansebastianak Elorriaga auzoan

Zumaiako Elorriaga auzoan ostiral gauean hasiko dira ospatzen San Sebastian festak; Bi asteburutan ospatuko dituzte jaiak Elorriagan, eta txapelketek eta herri bazkariek tarte berezia izango dute hilak 22ra bitartean. Ostiralean, mus txapelketarekin hasiko dituzte sansebastianak; 22:30ean hasiko da saioa, baina izena ordu erdi lehenagotik eman ahal izango da; bikote bakoitzak 20 euro ordainduko dute, eta ondoren lau usteletara, lau erregeetara eta lau hamarrekotara jokatuko dituzte. Sariei dagokienez, berriz, txapelketa irabazten duen bikoteak 350 euro eta txapela jasoko ditu; bigarren bikoteak, berriz, 200 euro eta txapela irabaziko ditu; hirugarren eta laugarren postuan geratzen diren bikoteek, berriz, 100 eta 50 euro eskuratuko dituzte, hurrenez hurren.