Etzi, martxoak 26, bukatuko da datozen egun eta asteetan Zestoako Udal Liburutegian gauzatuko dituzten bi ekintzatarako izena emateko epea.
Datorren zapatuan, martxoak 28, egingo duten Paperezkoak egitasmoaren barruko saiorako izen ematea da bata. Larunbatean, 11:30ean hasiko da liburutegian ipuinen, jolasen eta abarren bidez 2 eta 5 urte arteko haurrak liburuetara gerturatzea xede duen egitasmoaren hil honetako hitzordua.
Apirilaren 9an, berriz, Pazko Asteko ostegunean eta 10:00etatik 12:00etara, Jolastuko al gara? izeneko sormen tailerra emango dute liburutegian, Hitzetik Loratu egitarauaren barruan, Lehen Hezkuntzako 1. eta 2. zikloetako ikasleei zuzenduta. Jolastuz, idatziz, marraztuz eta eskulanak jorratuz, beren liburuxkak sortzeko aukera izango dute tailerreko parte hartzaileek.
Aste honetako zein apirilaren 9ko saioetarako izena emateko epea etzi bukatuko da, eta interesa dutenek liburutegian bertan eman behar dute izena.