Zestoako Herri Krosaren aurtengo edizioak badu data: martxoaren 15ean, igandez, egingo dute. Iñaki Iruretaren oroimenez egiten duten probaren 46. edizioa izango da udalak eta Zestoako Atletismo Taldeak antolatutakoa, eta umeek nahiz helduek parte hartzeko aukera izango dute.
Egun horretan 10:00etan hasiko dira lasterketak, eta mailaz maila, herrigunean nahiz herri inguruan gauzatuko dituzte ibilbideak. Lasterka nagusia, berriz, 11:30ean hasiko da; ibilbide luzea, 8.630 metrokoa, eta motza, 2.770 metrokoa. Proba bakoitzean sailkapeneko lehen neska-mutilek jasoko dituzte sariak, baita aurreneko zestoarrek ere.
Dagoeneko zabaldu dute proba nagusian izena emateko epea. Herrikrosa webgunean eman daiteke izena, hamar euro ordainduta. Antolatzaileek herritarrei lasterketan parte hartzeko deia egin diete.