Otsailaren 8an, igandez, izango da Kobaz Koba probaren hamargarren edizioa, eta lasterketaren atarian, entrenamendu saio gidatua antolatu dute. Zestoako korrikalariei zuzendutako hitzordua etzi egingo dute; 08:30ean elkartuko dira partaideak kiroldegiaren aurrean.
Larunbatean Artzei –hamabost kilometro– ibilbidea egingo dute hala nahi duten korrikalariek, arduradun baten gidaritzapean. Probako partaideek ibilbidea hobeto ezagutzea da entrenamendu saioaren xedea.
Hitzordu horretarako izena kiroldegian eman ahal izango da biharko 12:00etara bitartean, eta parte hartzeko ez da ordaindu beharrik izango; nahikoa izango da izen-abizenak emanda. Entrenamenduaren ostean, zalantzak argitzeko nahiz kiroldegian dutxatzeko aukera izango dute herritarrek.