Formol Laborategiak eta Susa argitaletxeak elkarlanean ondu duten Heriotzak Eduardo du izena ikuskizuna Zestoara iritsiko da igandean, urriaren 5ean. 18:30ean hasiko da emanaldia, Kultur Etxeko aretoan. Sarrerak salgai daude jadanik Portale kulturgunean, baina egunean bertan ere erosteko aukera izango da, Kultur Etxean bertan. Kulturguneko bazkideek 4 eurotan eros ditzakete sarrerak, eta bazkide ez direnek 5 eurotan.
Esperimentu bat, antzerkia, performancea edo "poesia ez-errezitaldia". Zaila da Heriotzak Eduardo du izena lana deskribatzen. Susa argitaletxearen Munduko Poesia Kaierak liburu bilduma oinarri hartuta, jolas eszeniko bat sortu dute Formol Laborategiko kideek. Hala, fisikoa eta birtuala denaren arteko mugak esploratu eta publikoaren eta eszenatokiaren arteko ohiko hesiak ezabatuko dituzte, eta bizitza eta heriotza, eztanda eta bakea, gelditasuna eta bibrazioa, isiltasuna eta kantua eta antzeko dualidadeak izango dituzte hizpide.