Hezetasuna tarteko, lehen partida hasi eta gutxira, bertan behera utzi zuten atzo Zestoako pilotalekuan jokatzekoak ziren pilota jaialdia. Udalak azaldu duenez, tenperatura altuen eraginez, bat-bateko kondentsazioa izan zen pilotalekuan, eta kantxa eta hormak egoera txarrean geratu ziren.
Hori dela eta, gaur, 19:00etan hasita jokatuko dituzte atzo bertan behera utzitako bi partidak. Lehen partida, atzo hasi egin bazuten ere, osorik jokatuko dute gaur; ez dituzte kontuan hartuko atzo lortutako tantoak. Lehia horretan Egiguren V.a eta Gabirondo Alberdi II.aren eta Lizeagaren kontra ariko dira. Ondoren, Masters Caixabank txapelketako neurketa izango da –Masters A Seriekoa–, eta Urrutikoetxeak eta Martijak Larrazabal eta Rezusta izango dituzte aurrez aurre.
Sarrerak Zestoako turismo bulegoan erosi eta gaur jaialdira joan ezin dutenei dirua itzuliko diete gaur, 08:30etik 14:00etara, udaletxeko harrera bulegoan.