Igande honetan, ekainaren 8an, 56 urte beteko dira Andoni Albizuri eta Rafael Rezabalek Ekaingo margoak aurkitu zituztela, eta urteurrena ospatzeko eskaintza berezia antolatu du Ekainberri museoak.
Igande honetan, egun osoan zehar, Albizuri eta Rezabalen aurkikuntzaren inguruko azalpenak eman eta aurkitutako margoen garrantzia azalduko die bisitariei Zestoako museoak. Aurkikuntzaren ondoren egin ziren ikerketen inguruko informazioa emango zaie, eta bertan topatutako horma-irudien balioa azalduko dute museoaren arduradunek.
Horretaz aparte, bi bisita berezi antolatu ditu; 12:00etan egingo dute bat, euskaraz, eta 16:00etan bestea, gazteleraz. Horietan, Antxietako protagonisten larruan jarriko dira bisitariak, Ekain kobazuloan margolanak aurkitu zituzten unea biziz: erreplikako argiak itzaliko dituzte, eta bisitariek kasko eta argi propiekin ikusiko dituzte hormetako margolanak.