Xabin Etxaide zestoarra hil zen Baionako Monbar hoteleko atentatuaren 40. urtemuga izango da datorren irailaren 25ean, eta Gogora memoriaren euskal institutuak GALen biktimei eskainitako erakusketa zabalduko du udazkenean.
Atentatu hartan Ipar Euskal Herrian errefuxiatuta zeuden ETAko lau lagun hil zituzten: Etxaidez gain, Agustin Irazustabarrena, Inaxio Asteasuinzarra eta Jose Mari Etxaniz. Hilketa haiek jazo zirenetik 40 urtera, aurtengo udazkenerako, GALen biktimei buruzko erakusketa monografikoa prestatuko du Gogorak. Bestalde, GALen ibilbideari buruzko mahai inguru bat ere egingo dutela aurreratu dute.
Marseillako (Frantzia) mafiarekin lotura zuten mertzenarioek egin zuten Monbar hoteleko atentatua, GALen aginduz. Mertzenario haietako bi atxilotu egin zituzten, eta epaiketan aitortu zuten Jose Amedo poliziak kontratatu zituela atentatua gauzatzeko.