Zestoako Danbolin aldizkariak herri bazkaria egin zuen joan den zapatuan. Danbolinen 25. urteurrenaren harira antolatu eta egin zuten bazkaria kiroldegiaren atarian, eta jende ugarik parte hartu zuen bertan.
Laiak dendak antolatutako Ardo Dastaketaren ostean egin zuten bazkaria. Bazkalostean, berriz, askotariko ekintzak egin zituzten: hasteko, Olber eta Ander Iribar disko jartzaileak aritu ziren arratsaldea girotzen, eta ondoren, bingo musikatua egin zuten. Gaztaren pisua asmatzeko jolasa eta Hikaldiaren jolasa ere egin zituzten.
Danbolinek balorazio positiboa egin du zapatuko herri bazkariaz: "Zoragarria izan zen. Danbolinek antolatutako beste ekintza bati herritarrek horrela erantzuten diotela ikusteak beste 25 urtez jarraitzeko indarra ematen digu. Ezin eskertuago gaude bertaratuek mahaiak jarri, bingoan jolastu eta dena jasotzeko izan zuten prestutasunagatik. Magia egin zenuten minutu gutxitan! Eta nola ez eskertu aurrez antolakuntzan lagundu diguzuenoi eta egunean bertan jatekoa prestatzen zein zerbitzatzen egon zinetenoi", azaldu du Danbolinek.