Zestoarrak santakutzetarako atzera kontaketan murgildu dira. Gaur, astelehenez, hasiko dituzte haurren eta helduen danborradarako entseguak, eta ostiralean ekingo diete festei. Hain zuzen, maiatzaren 2 goizean hasiko dira festetarako prestatutako ekintzekin. 11:00etan Santakutzetako Pilota Txapelketaren finalak jokatuko dituzte pilotalekuan. Arratsaldean ere kirolaz gozatzeko aukera izango dute herritarrek, 17:00etan hasita Herriarteko Pilota Txapelketaren barruko partida jokatuko baitute Abauntzuko pilotariek. Zestoarrek Lazkao hartuko dute etxean.
Ondoren, 19:00etan, botako dute jaiei hasiera emateko suziria udaletxetik, Idiakaitz Txistulari taldeak eta Azpeitiko zein Zestoako Udal musika bandek lagunduta.
Ostiral gauean egingo dute helduen danborrada, 22:30ean hasita, eta honako talde hauek parte hartuko dute: Gure Txokoa eta Gaztetxea (Zestoako bandak girotuta),Trapuzarrak eta Zitxontarrak (Ustekabe txarangarekin), Ipintza eta Lauiturri (Zumai txarangarekin) eta Aldrebesak eta Atabalak (Azpeitiko musika bandarekin).
Hona hemen 2025eko santakutzetako egitaraua:
Maiatzak 2, ostirala:
- 11:00. Santakutzetako Pilota Txapelketako finalak.
- 19:00. Jaien hasiera. Kalejira Idiakaitz Txistulari taldearekin eta Azpeitiko nahiz Zestoako bandekin.
- 22:30. Helduen danborrada. Elkarte eta taldeak: Gure Txokoa eta Gaztetxea (Zestoako banda): Trapuzarrak eta Zitxontarrak (Ustekabe txaranga), Ipintza eta Lauiturri (Zumai txaranga); Aldrebesak eta Atabalak (Azpeitiko banda).
- Ondoren, Ustekabe Txaranga.
Maiatzak 3, larunbata:
- 10:30. Idiakaitz Txistulari taldearen diana.
- 12:00. Erremontari herriz herri erremonte jaialdia, kiroldegian.
- 18:00. Umeen danborrada.
- 20:00. Ane eta Amets trikitilarien erromeria udaletxeko arkupean.