Atzo banatu zituzten, bertako plazan, Arroabeko VII. Ipuin Lehiaketaren sariak. Aurten denera 27 idazlan aurkeztu dituzte Ezkaizto auzo elkarteak Arroako eskolak lagunduta antolatzen duen lehiaketara, lau mailatan banatuta.
Maila bakoitzean saridun bat aukeratu du Joseba Ossa eta Dani Aizpurua itzultzaileek eta Amaia Sarriegi eskolako irakasleak osatutako epaimahaiak: LH 1-2 mailan, Adonai Etxeberriaren Ume arraroa saritu dute; LH 3-4 mailan, Jare Manterolaren Ilargiko abenturak izan da saritua, eta aipamen berezia jaso dute Mara Giustiren Laiaren ipuina-k eta Irati Iribarren Naranjen uhartea-k; LH 5-6 mailan Nahia Doñelfarentzat izan da saria Alaia eta eskolako misterioa ipuinarekin; helduen mailan, berriz, Maria Iribarrek idatzitako Katebegiak aukeratu du epaimahaiak, eta aipamen berezia egin dio Josune Larrañagaren Ama ipuinari.
Liburuxka eta irakurketa
Sari banaketa ez da, ordea, VII. Ipuin Lehiaketaren azken ekitaldia izango. Aurreko urteetan bezala, lehiaketara aurkeztutako ipuin guztiak liburuxka batean jaso dituzte, eta Txara dendan dago eskuragarri liburuxka, nahi duten auzotarrek txandaka irakur dezaten. Eta, iaz bezala, lehiaketan parte hartu duten ipuinen irakurketa partekatua ere egingo dute aurten. Datorren asteartean izango da hori, apirilaren 8an, 16:45ean, Eskola Zaharrean; atzokoa bezala, Arroako Liburuaren Hamabostaldiaren barruan egingo dute hilaren 8ko ekitaldia ere.