Ertzaintzak 47 eta 20 urteko bi gizon atxilotu zituen atzo, astelehena, Zestoako enpresa batean lapurreta egitea egotzita. 17:00ak aurretik harrapatu zituen Ertzaintzaren patruila batek ustezko lapurrak Zestoako industrialde batean kokatuta dagoen enpresa batean kobrea harrapatzen ari zirela.
Ertzaintzak ohar bidez jakinarazi duenez, ertzainek enpresaren kanpoaldean bi auto ikusi zituzten aparkatuta, eta ibilgailuen alboan lau pertsona "zelatan". Poliziaren arabera, lau lagun horiek ez zuten "arrazoizko" azalpenik eman ertzainek zertan ari ziren galdetu zietenean. Lau susmagarriak identifikatu zituzten aurrena ertzainek, baina segituan egiaztatu ahal izan zuten horietako bi enpresan sartu zirela, behartuta zegoen aireztapen eremu batetik, hain zuzen.
Lantegiaren barruan, ebakigailu baten ondoan, "lapurtzeko prest" zegoen kobrezko kablea aurkitu zuen Ertzaintzak; izan ere, polizia iturrien arabera, kablea "moztuta eta bilduta" zegoen. Egoera ikusita, Ertzaintzak lantegi barrura sartu ziren bi pertsonak atxilotu zituen, indarra erabiliz lapurreta egitea egotzita. Beste bi lagunei, berriz, eginbideak ireki zizkieten ikertu gisa, ustez lapurretan parte hartu zutelakoan.
Ertzaintzak atxilotuak ertzain etxera eraman zituzten beharrezko izapideak egiteko eta epailearen aurrera eramateko.