Zestoako Ama Birjina festen barruan, profesionalen pilota jaialdia izango da irailaren 6an, ostiralez. Orain arte salgai jarritako sarrera gehienak saldu dira, eta hori dela eta, gaurtik –ostirala– aurrera beste 70 sarrera jarriko dituzte eskuragarri turismo bulegoan. Sarrera horiek harmailetako erdigunekoak dira; hau da, laugarren eta seigarren kuadroen artekoak. Erdigunetik haragoko sarrerak Internetez eros daitezke, www.entradasfronton.com atarian.
Jaialdiko partida nagusia Masters Caixabank ligako azken jardunaldia izango da; Altuna III.a eta Iztueta Ezkurdiaren eta Albisuren aurka lehiatuko dira. Lehen neurketan, berriz, Egiguren V.a eta Erostarbe Salaberriaren eta Gabirondoren kontra ariko dira. 21:15ean hasiko da jaialdia.