Zestoa eta Urepele senidetzen dituen proiektuaren barruan Andoandik (Gipuzkoa) Goizuetara (Nafarroa) ibilaldia antolatu dute Zestoako Udalak eta Agiro mendi klubak elkarlanean, bi herrien arteko ibilbidea zehazten hasteko. Apirilaren 20an, larunbatez, egingo dute ibilaldia. Zestoa eta Urepele (Nafarroa Beherea) herriak iazko azaroan senidetu ziren; azaroaren 18an sinatu zuten senidetza akordioa Zestoan, eta azaroaren 27an egin zuten Urepelen (Nafarroa Beherea). Ibilaldia 22 kilometro ingurukoa izango da eta interesa dutenek Zestoako kiroldegian eman beharko dute izena apirilaren 17a baino lehen.
Behin Goizuetara iritsita, bertako jatetxe batean bazkalduko dute. Hala, ibilaldiaren egunean irteera 07:30ean izango da, gurutzean, eta itzulera 17:00etan egingo dute. Ibilaldira joan nahi dutenek 10 euro ordaindu beharko dituzte, eta bazkaria aparte ordainduko da.