Txikitasunean Handi asteburua ospatzen ari dira egunotan Arroabean, auzoko Txikitasunean Handi elkarteak antolatuta. Atzo, ostirala, hasi zituzten egitasmo horren barruko ekitaldiak; hain zuzen ere, Potx pailazoaren emanaldiarekin hasi zuten arratsaldea, eta 22:00etan mus txapelketa azkarra jokatu zuten.
Gaurko ere egitarau oparoa dute antolatuta Arroabeko bizilagunek. Goizean, arroarren arteko jolasak egin dituzte frontoian; arratsaldean, berriz, triki poteoa egingo dute, 20:00etan hasita, eta ondoren, 21:00etan, bertso afaria egingo dute. Iñigo Izagirre, Aitor Mendiluze eta Aitor Salegi bertsolariak izango dira afaria bertso doinuz girotzeaz arduratuko direnak.