Gipuzkoako Gotzaindegiak Zestoako Gaztetxearen kontra jarritako salaketak aurrera jarraitzen du, eta dagoeneko iragarri dute epaiketa eguna: apirilaren 18a. Zestoako Gazte Asanbladak eman du horren berri, bideo bidez, eta aukera baliatu du Elizari beste behin eskatzeko negoziatzera eser dadila eta salaketa ken dezala.
Hilabete baino gehiago igaro da Zestoako Gazte Asanbladako kideek Elizondo eraikina okupatu zutenetik, Gaztetxe berria eraikitzeko leku aproposa zela iritzita, eta harrezkero, behin baino gehiagotan saiatu izan dira Elizarekin harremanetan jartzen, bera baita eraikinaren jabea. Elizak ez du gazteekin hitz egiterik nahi izan, baina eraikinera sartu eta gutxira izan zuten haren berri, Gipuzkoako Gotzaindegiak salaketa jarri baitzien. Orain jakin dute apirilaren 18an izango dela epaiketa.