Goizean goizetik nagusitu da Gabon giroa gaur, abenduak 24, Zestoan. Hala eta guztiz ere, arratsaldean izan da unerik gogoangarrienetako bat; izan ere, Euskal Herri osotik barrena opariak banatzen hasi aurretik, Olentzerok eta Mari Domingik geldialdia egin dute Zestoan, bertako herritarren gutunak jaso ahal izateko. Lau Iturritik barrena iritsi dira bi ikazkinak, eta ondoren, herriko kaleak zeharkatu dituzte, kantuan.
Ezohiko ekitaldia izan da, gainera, gaurkoa, plazan ekitaldi berezi bat egin baitute; bertan, aurten izandako gauzak txarrak erretzeko abagunea izan dute herritarrek, baita Eguberriari desio berriak eskatzeko parada ere.