Eguraldi bikaina eta bero sapa lagun, Kuadrilla Eguna ari dira ospatzen Zestoan. Amabirjinak azken txanpan sartu dira dagoeneko, baina asteburu osoan zehar hainbat ekitaldi izango dira festei behar bezalako amaiera emateko. Gaur, larunbata, zirku-tailerrarekin hasi dute eguna Zestoan, eta, ondoren, paella txapelketa izan da herriko kaleetan. Parte-hartzaileetako gehienak udaletxe azpiko arkupeetan egon dira paellak prestatzen, baina izan dira zeregin horretarako herriko beste hainbat txoko hautatu dituzten kuadrillak ere. Gainera, era, kolore eta zapore desberdinetako paellak egin dituzte gaurkoan; lehiakide batzuek ohiko osagaiak erabili dituzte otordua prestatzeko, eta beste batzuk, ausartagoak izan dira osagai horiek aukeratzerako orduan. 14:30 inguruan igaroko da epaimahaia paella horiek guztiak dastatzera.
Ondoren, ohi bezala, herri bazkaria egingo dute kuadrillek plazan, eta dagoeneko prest daude otordurako mahaiak eta platerak. Jaia, ordea, ez da hor amaituko; izan ere, arratsaldean kuadrillen arteko jolasak egingo dituzte, eta DJ Davilaren emanaldia ere izango da.
Hona hemen gaurko egitaraua:
Irailak 10, larunbata
14:30. Paella lehiaketako epaimahaia igaroko da.
Ondoren, herri bazkaria plazan.
17:00. Kuadrillen arteko jolasak plazan, Ustekabe txarangak alaituta.
19:00. DJ Davila, kalez kale.
23:00. DJ Davila, plazan.