San Isidro festetan murgilduta dabiltza Arroabeko bizilagunak. Atzo, larunbatez, ekin zioten jaiei. Haurrentzako zinemaz, txokolatadaz eta buruhandiez gozatu ahal izan zuten auzotarrek Joxe Miel plazan. Iluntzean jarraitu zuten egitarauarekin, eta 80 lagun inguru bildu ziren bertso-kantu-afarian.
Jaiak ez du etenik izan, eta gaur eguerdian jarraitu dute antolatutako ekintzekin. Hain zuzen, 12:00ak aldera hurbileko produktuen pintxo dastaketa eta haurrentzako barazki landaketa egin dituzte. Adin desberdinetako lagun ugani animatu da antolatutako ekintzetan parte hartzera, eta giro ederrean igaro dute goiz-eguerdia. Orain, 14:00ak aldera, paella jana egingo dute Txomin tabernan, eta mus txapelketarekin borobilduko dute eguna.
Jaiak baliatuz salaketarako tartea ere hartu dute, eta Arroabeko Kutsaduraren Aurkako Lantaldeak martxan jarri duen sinadura bilketa egiteko mahaia jarri dute. Izan ere, Arroabean kezkatuta jarraitzen dute azkenaldian sumatu duten airearen “gehiegizko kutsadura” dela eta. Kezkatuta, eta arazoari aurre egiteko lanean ere bai. Horretarako eratu zuten joan den martxoan Kutsaduraren Aurkako Lantaldea, eta lantalde horrek auzotarren sinadurak eta salatzen duten kutsaduraren arrastoak erakusten dituzten argazkiak zein bideoak jasotzeko kanpaina jarri du martxan orain.