Bi urteko etenaren ostean, bueltan da Zestoako Ibilaldi Neurtua. Agiro mendi klubak antolatu du ekintza, Zestoako Udalaren laguntzarekin, eta hogeigarren ekinaldia izango da aurtengoa. Ekainaren 18an, larunbata, izango da ibilaldia, eta bi ibilbide izango dituzte aukeran animatzen direnek: luzea, 28 kilometrokoa, eta motza, hemezortzi kilometrokoa.
Ibilbide luzea egin behar dutenak 07:00etan abiatuko dira, eta motza egin behar dutenak 08:00etan. Interesatuek dagoeneko eman dezakete izena, herrikrosa.eus helbidean. Ekainaren 15a izango da izena emateko azken eguna. Partaide bakoitzak kamiseta bat jasoko du.