Garikoitz Mendizabal zestoarra EAJren legebiltzarkide izango da gaurtik aurrera. Alderdiak atzo jakinarazi zuen Mendizabalek Kerman Orbegozok utzitako tokia hartuko zuela Gasteizko Legebiltzarrean, hauteskundeen Gipuzkoako zerrendaren hurrenkera jarraituz, beraz. Orbegozok Donostiako Udaleko Ogasun eta Finantza zinegotzi kargua izango du aurrerantzean. Mendizabal, bere aldetik, Kultura, EITB kontrola eta Lan eta Enplegu batzordeetan arituko da.
EAJren alkategaia izan zen Mendizabal 2019ko udal hauteskundeetan, eta oposizioko taldearen bozeramailea da gaur egun Zestoako Udalean. Egiteko horrekin ere jarraituko du aurrerantzean.