Jon Artano kazetari zestoarrak irabazi du 2022ko Tene Mujika beka, Anderik Ande izeneko proiektuari esker. Amerikaren eta euskaldunen arteko harremanak aztertuko ditu lanean. Hain zuzen ere, Ameriketan ibilitako hainbat euskaldunen eta Euskal Herrian diren hainbat amerikarren kontuak jasoko ditu Artanok liburuan, eta urtebeteko epea izango du lan hori gauzatzeko.
Bi zati izango ditu lanak, Artanok bekara aurkeztutako proiektu proposamenean azaldu duenez. Batetik, Joandakoak izeneko atala, Hego Amerikan kokatutakoa –Argentinan, Txilen, Bolivian, Perun, Ekuadorren, Kolonbian eta Venezuelan, besteren artean–, hara joandako hainbat euskal herritarren istorioak bilduko dituena; eta bestetik, Etorkizunaz izeneko atala, Latinoamerikatik Euskal Herrira etorri eta garbiketa nahiz zaintza lanetan aritzen diren emakumeez ariko dena. Besteak beste, elkarrizketak, kronikak eta bidaia liburuek izan ohi dituzten osagarriak izango ditu zestoarrak ontzeko asmoa duen kontakizunak.
Euskal Herriko historia hurbilaz idazteko fikziozkoak ez diren proiektuak saritzen ditu Debako Udalak eta Elkar argitaletxeak antolatutako bekak. Aurten aurkeztutako lanen artean Artanorena nabarmendu du Idurre Eskisabelek, Imanol Muriak eta Elixabete Garmendiak osatutako epaimahaiak.