Hitzaldiak, solasaldiak, mural margoketa eta jaialdia. Horiekin osatu du Urola Erdiko Itaiak Azaroaren 25aren bueltarako prestatu duen egitaraua. Azkoitian, Azpeitian eta Zestoan jarri dituzte hitzorduak datozen egunetarako.
Egungo kultura progresista: emakumeon ahalduntzea ala indarkeriaren normalizazioa? izenburupean aurkeztu du Itaiak Emakumeenganako Indarkeriaren Aurkako eguna dela-eta osatu duen egitaraua, eta ostiral honetan estreinatuko du, Azkoitian. Hau da Azaroaren 25aren inguruan Urola Erdiko Itaiak antolatutako egitarau osoa:
Azaroaren 12a, ostirala. Emakumeon ahalduntzea ala indarkeriaren normalizazioa? hitzaldia. Azkoitiko Elkargunean, 18:00etan.
Azaroaren 14a, igandea. Mural margoketa egingo dute Zestoan, 12:00etan.
Azaroaren 19a, ostirala.
- Oh gu hemen tertulia, Zestoako Alonderoko aretoan, 18:00etan.
- Jaialdia Zestoako Gaztetxean, 20:00etatik aurrera.
Azaroaren 21a, igandea. Oh gu hemen tertulia, Azpeitiko Basazabalen, 18:00etan.
Donostiara joateko autobusa
Itaiak azaroaren 25ean, ostegunarekin, egingo duen mobilizazioarekin bat eginez, Urola Erdiko Itaiak autobusa jarriko du Azkoititik, Azpeititik eta Zestoatik hara joan nahi dutenentzat.
18:00etan hasiko da azaroaren 25eko mobilizazioa, Bulebarrean. Hara joateko autobusa, berriz, 16:50ean irtengo da Azkoititik, 17:00etan Azpeititik, eta 17:10ean Zestoatik. Autobuserako izena ematea gomendatu dute antolatzaileek, Itaiako kideen bitartez edo Azpeitiko Haginpe tabernan.