Zestoako Udalak, bigarren astez jarraian, hainbat aldaketa eta neurri iragarri ditu asteburuan Zestoan izango diren ekitaldietan. Alde batetik, Bizitza plataformak larunbaterako, irailak 11, egun osorako egitaraua iragarri zuen sare sozialetan, baina udal erakundeak ekitaldi hori ez baimentzea erabaki du "indarrean dagoen araudian eta espazio publikoen erabilerak eskatzen dituen baldintzetan oinarrituta". Antolatzaileei dagoeneko erabaki horren berri eman dietela jakinarazi du udalak.
Bestetik, Manitu eta Belako musika taldeek larunbatean eman behar duten kontzertuen ordutegia aurreratu egin dute; 22:00etan igo behar zuten talde horiek agertokira, baina 20:00etara aurreratu dituzte kontzertuak. Horren harira, udalak nabarmendu du sarrera guztiak salduta daudela dagoeneko eta egindako aldaketen ondorioz sarrera erosi dutenei eta kontzertura joan ezin direnei dirua itzuliko dietela; dirua itzultzeko epea ostiralean, hilak 10, amaituko da, 12:00etan. Kontzertuetan "osasun eta segurtasun neurri guztiak" bete beharko direla ere azpimarratu dute.
Horrez gain, larunbatean "kanpotik etor daitekeen jende uholdea saihesteko", herriko sarreretan eta autobus geltokian Ertzaintzaren kontrolak ezarriko ditu udalak, eta zestoarrak ez direnei Zestoara ez joateko eskaera egin die erakundeak.