Joan den astean, Gipuzkoako Ertzaintzaren lurraldeko buruzagitzak eta Urola Kostako Ertzain-Etxeko buruek bilera egin zuten Urola Kosta eskualdeko herrietako ordezkariekin, Azkoitiko Udaleko bilkura aretoan. Azkoitiko Udalaren izenean Javier Zubizarreta alkateak parte hartu zuen bilkuran, eta Zestoako Udalaren izenean Mikel Arregi alkateak.
2020ko delitu ekintzen inguruko balantzea eta azterketa egiteko elkartu zen Tokiko Polizia Koordinaziorako Batzordea. Agenteek delituen eta krimenen estatistikak aurkeztu zituzten herrika, eta prebentzioarekin eta plangintzarekin lotutako gaiak jorratu zituzten. Azken urteetan delituak orokorrean jaitsi egin badira ere, iruzurrek, batez ere Internet bidezkoek, igoera esanguratsua izan dute.