Kriminalizazioaren aurrean gazte langileok antolatu leloarekin elkarretaratzea egin dute gaur eguerdian Zestoako plazan, Gazte Koordinadora Sozialistak (GKS) deituta. Pandemia sasoiko "aterabide poliziala" eta "gazte kriminalizazioa" salatzeko mobilizazioa egiten ari zirela, ertzainak agertu dira plazan, eta kontzentrazioan parte hartzen ari ziren bost lagun identifikatu dituzte, "kontzentrazioaren arduraduna eta beste lau gazte", Zestoako GKSk jakinarazi duenez. Antolatzaileek azaldu dute "zortzi bat ertzain" joan direla plazara eta pandemia sasoiko "aterabide poliziala" eta "gazte kriminalizazioa" salatzeko egin duten mobilizazioa baimenik gabe egitea egotzita identifikatu dituztela bost lagun horiek.
Gertatutakoa salatzeko atera duen oharrean eman ditu azalpenak Zestoako GKSk. Elkarretaratzea "segurtasun neurri sanitario guztiak betez" egin dutela esanda, azpimarratu dute "herrian ez dagoela ohiturarik kontzentrazio bat egiterakoan baimenak eskatzeko, eta orain arte ez dela arazorik egon". Horren haritik, "lege burgesaren gainetik, eskaera egin ala ez, manifestatzeko dugun zilegitasuna aldarrikatu nahi" izan du GKSk.
"Gogor salatu" ditu taldeak "gertatutakoa eta poliziaren jarrera". Era berean, "eskerrak eman" dizkie Zestoako GKSk elkarretaratzean parte hartu dutenei "eta poliziaren aurrean babesa adierazi" dieten guztiei.