Udan Zer Zestoan egitasmoaren barruan, herri kirol erakustaldia izango da igandean udalak antolatuta. 18:00etan hasiko da saioa, eta kirolariak harri-jasotzen, aizkoran nahiz lasto-altxatzen ariko dira. Kirolarien artean, baina, aldaketa bat izango da. Hain zuzen ere, Luis Txapartegi aizkolari aizarnarra min hartuta dago eta Kepa Peñagarikano azpeitiarrak ordezkatuko du. Peñagarikanorekin batera, Xabier Orbegozo Arria V.a eta Andoni Iruretagoiena ariko dira aizkoran. Aldiz, harri-jasotzen Hodei Iruretagoiena, Jakes Iruretagoiena eta Jagoba Otaegi. Tubi Bustinza, aldiz, lasto-altxatzen ariko da.
Igandeko erakustaldirako sarrera doakoa izango da, baina aurrez erreserba egin beharko da. Izan ere, udalak koronabirusaren hedapena saihesteko hainbat neurri hartu du, tartean plazak mugatu ditu. Horrenbestez, erakustaldiaz gozatu nahi duten herritarrek Zestoako Turismo Bulegoko 943-86 88 11 telefonora deitu beharko dute, eta izen-abizenak nahiz telefono zenbakia jakinarazi beharko dituzte.