Zestoako Udalak bisera babesleak eskuratu ditu Tolosako Lanbide Heziketa eskolatik. Boluntario talde bat ari da biserak ekoizten bertan, 3D inprimagailuak erabiliz. Zestoako Udala harremanetan jarri zen hango arduradunekin, eta biserak herriko merkatariei banatzea erabaki zuen.
Atzo ekarri zituzten biserak Zestoako udaletxera, eta gaur goizean prestatu dituzte udal ordezkariek eta herriko boluntario sarearen parte diren hainbat herritarrek. Behin biserak prestatuta, jendaurrean lan egiten duten herriko saltokietara eraman dituzte, langileek babes-neurri bat gehiago izan dezaten.
Bisera horiek egunero desinfektatzea komeni da, eta Zestoako Udalak adierazi duenez, udaletxean geratzen dira gehiago oraindik, dendariren batek gehiago beharko balitu.