Mikrobioen mundu liluragarria izenburupean, bi hitzaldi eskainiko ditu Josu Albero biologo eta mikrobiologian adituak Zestoako Portale kultur elkartean. Astelehenez eskainiko ditu solasaldiak Alberok, martxoaren 9an eta 16an, hain zuzen. Bi saioak 19:00etan hasiko dira.
"Mikrobioen mundua oso zabala denez, eta gaiak luzerako ematen duenez, azalpen guztiak hitzaldi batean eman beharrean, bitan emango ditut", azaldu du Alberok. Hala, 75 minutuko bi solasaldi eskainiko ditu. Hizlariak aurreratu duenez, lehen saiora bertaratzen diren herritarrek mikrobioak zer diren ezagutuko dute, baita horien bizitokia eta bizimodua nolakoa den ikasi ere. Gainera, mikrobioek ingurugiroan duten garrantziaz nahiz bakterioez arituko dira.
Martxoaren 16ko hitzaldian, aldiz, honako gai hauek landuko dituzte: "Mikrobioen alde iluna: bakterio patogenoak; inmunitate-sistema; txertoak eta antibiotikoak; gaitz infekzioso nagusiak eta Mikrobioen erabilera industriala: Bioteknologia". Hitzaldietara bertaratzen diren herritarrek gaia sakonago ezagutuko aukera izango dute. Solasaldiak irekiak izango dira eta, beraz, gaian interesa duen herritar oro hurbil daiteke saioetara.