Urola Erdiko Zerbitzu Mankomunitateak arropa eta hondakin berrerabilgarriak jasotzeko edukiontzi berriak jarri ditu Aizarnazabalen, Azpeitian, Azkoitian, Zestoan, Errezilen eta Beizaman. Lehengo edukiontzietan arropa soilik jasotzen bazuten ere, edukiontzi berrietan jostailuak, liburuak, aparatu elektriko txikiak eta bitxiak ere bilduko dituzte –erabiltzeko moduan daudenak–.
Hori dela eta, Urola Erdiko Mankomunitateak eskatu du ebakiak eragiteko arriskua duten gauzak ez uzteko edukiontzietan, hala nola kristaleria, baxerak, labanak, guraizeak eta kuterrak. Etxeko hondakin arriskutsuak ere edukiontzi horietan ez lagatzea eskatu du. Tamaina handiko hondakinak edukiontzi horien ondoan uztea debekatuta dagoela azaldu du mankomunitateak, eta ohartarazi du halakoak Lapatxeko Garbigunera eraman behar direla edo Emausen bilketa telefonora (656 789 574) deituta jasoko dituztela.
Orotara, 31 edukiontzi berri jarri dituzte Urola Erdiko herrietan. Zenbait herritan lehen zeuden edukiontziak ordezkatu dituzte. Beste herri batzuetan, berriz, edukiontzi gehiago jarri dituzte.