Duela bi urte final laurdenetan bezala, aurten finalaurrekoetan egokitu zaie elkarren kontra aritzea Azkoitiari eta Azpeitiari, esku pilotako Gipuzkoako Herriarteko Txapelketan. Zestoa, aldiz, txapelketaren azkenaurreko kanporaketan sartzeko aukerarik gabe gelditu da.
Joan den ostiralean jokatu zituzten final laurdenetako kanporaketen itzulerako partidak Azkoitiak eta Azpeitiak. Azkoitiarrek etxean jokatu zuten, joanekoan Altzon lortutako 1 eta 2ko abantaila alde zutela. Gurea pilotalekuan, emaitza borobildu zuten Azkoitiko pilotariek eta 3 eta 0 nagusitu ziren: 22 eta 19 irabazi zuten kadete mailako partida, 22 eta 17 jubenilena, eta 22 eta 6 seniorrena.
Azpeitia, berriz, astebete lehenago Izarraitz frontoian lortutako abantaila argiaren koltxoiarekin joan zen Hernanira. 3 eta 0 irabazi zuten azpeitiarrek joanekoan, eta beste horrenbeste egin zuten itzulerakoan, 6 eta 0eko emaitza sinatzeko: 5 eta 22 irabazi zuten kadeteek –finalaurrekoetarako sailkapena hasieratik ziurtatuz–, 16 eta 22 jubenilek, eta 19 eta 22 seniorrek. Herriartekoaren zazpigarren txapelaren bila egiten ari den bidean, partidarik galdu gabe iritsi da Azpeitia, egungo txapelduna, finalaurrekoetara.
Azkoitiaren eta Azpeitiaren arteko finalaurrekoaren joaneko partidak Azkoitiko Gurean jokatuko dituzte, asteburu honetan.
Zestoa, kanpora
Herriartekoaren finalaurrekoen atarian gelditu da, aldiz, Zestoa. Larunbatean jokatu zituzten zestoarrek Astigarragaren kontrako itzulerako partidak, etxean. Joanekoan izandako emaitzak ikusita –2 eta 1 Astigarragaren alde, eta tanteoan alde handiarekin–, hasterako zekiten ez zutela lan errazik izango, eta ez zen ezustekorik izan. Joanekoan bezala, jubeniletan erraz nagusitu ziren zestoarrak (22 eta 10), baina beste bi neurketetan garbia izan zen, era berean, Astigarragaren abantaila: 4 eta 22 kadeteetan, eta 11 eta 22 seniorretan. Horrenbestez, 4 eta 2 galdu zuen kanporaketa Zestoak.
Astigarragak eta Ataunek jokatuko dute Gipuzkoako Herriartekoaren beste finalaurrekoa.