Datorren larunbatean, ekainak 8, Pazko Festa ospatuko dute Aizarnan, eta egitarauaren baitan, 17:00etan Zestoako IX. Trikitilari Gazteen Txapelketa egingo da. Guztira, zazpi bikotek parte hartuko dute txapelketan, eta lehiatuko diren trikitilarietatik eta pandero-jotzaileetatik bederatzi eskualdekoak dira.
Honako hauek dira txapelketan lehiatuko diren bikoteak: Ane Uranga eta Nerea Lopetegi zestoarrak; Eider Garro eta Araitz Elizalde hernaniarrak; Iraia Arteaga azpeitiarra eta Nahia Dorronsoro bidaniarra; Julen Labaka errezildarra eta Garazi Larrañaga azpeitiarra; Ane Urbieta eta Iraia Korta zestoarrak; Ane Etxezarreta olaberriarra eta Sara Iriarte villabonarra; eta Intza eta Maria Illarramendi ahizpa zestoarrak.
Joan den urteko VIII. Trikitilari Gazteen Txapelketa Arroagoiko Santio-Santana jaietan egin zen, eta Eneko Urkola arrasatearra eta Julene Sarabia zaldibiarra nagusitu ziren txapelketan.