Eskualdeko hainbat pilotari ari dira parte hartzen Gipuzkoako Emakumea Pilotari Txapelketan

Martxan da dagoeneko ezker hormako binakako Gipuzkoako Emakumea Pilotari Txapelketa. Bi mailatan ari dira lehiatzen pilotariak, eta horietako batzuk eskualdekoak dira. Hain zuzen ere, joan zen abenduaren erdian hasi zen Bigarren Mailako txapelketa, eta nor baino nor ari diren bost bikoteetatik honako pilotari hauek dira Urola Kostakoak: Nagore Aramendi, Oihana Orbegozo, Alaitz Badiola, Araitz Eizagirre eta Naroa Agirre. Orain arte bi jardunaldi jokatu dituzte horiek; azkena joan zen abenduaren 28an, Azpeitiko Frontoi Txikian. Urtarrilaren 25ean, berriz, Zestoako Gurutzeaga pilotalekuan jokatuko dituzte norgehiagokak. Honako lotura honetan ikus daiteke Bigarren Mailako egutegi osoa. Lehen Mailako txapelketa, berriz, bihar hasiko da. Eneritz Arrieta azkoitiarrak parte hartu du gorengo maila horretan, eta Amaia Araiztegi izango du bikote. Zaldibian jokatuko dituzte biharko neurketak, 18:30ean hasita; Arrietak eta Araiztegik Ainhoa Urienen eta Patri Espinarren aurka neurtuko dituzte indarrak. Guztira, hiru jardunaldi jokatuko dituzte lau bikoteek, eta azkena Zestoako Gurutzeaga pilotalekuan izango da, urtarrilaren 25ean. Honako lotura honetan ikus daiteke Lehen Mailako txapelketaren egutegia.