Gaur goizean hasi dira Alonderoneko igogailu berria Portale kalearekin lotuko duen oinezkoentzako pasabidea jartzen, Zestoan.
Uztaileko lehen astean ziren lan horiekin hastekoak, baina bi aste atzeratu dira, azkenean; kiroldegia berritzeko lanetan ari den enpresa berak jarri behar du igogailuaren pasarela, eta hango lanek eragin dute hamabost eguneko atzerapena. Pasarela jartzea pare bat eguneko kontua izango dela aurreratu du udalak. Oinezkoentzako pasabidea finkatuta, igogailuaren makineria jartzea bakarrik geldituko da, obra osatzeko. Zubimusu eta Idiazpi kaleak Portale kalearekin lotuko ditu igogailu berriak.