Jon Artano: "Erantzuna neurrikoa iruditu zait, eta babestuta sentiarazi naute"

Iñaki Anasagasti EAJko kideak Jon Artano kazetariari zuzendutako kritikek soka luzea ekarri dute. ETBren berriemale zestoarrak Venezuelako hauteskundeen bezperan egindako lanaz hitz goigorrak idatzi ditu Anasagastik bere blogean. ETBko Erredakzio Kontseiluak Anasagastik esandakoak gaitzetsi ditu, eta lankide askok adierazi diote babesa Artanori. Berria egunkariak zestoarrarekin hitz egin zuen atzo. ETBko Erredakzio Kontseiluak agertu dion babesa eskertu du Artanok. "Erantzuna neurrikoa iruditu zait, eta babestuta sentiarazi naute", esan du. Bide batez, Venezuelan egindako lana azaldu eta defendatu du: "Caracasen egin dugun egonaldian, beti eta nonahi egiten dugun bezala, eginahalak egin ditugu EITBko ikus-entzuleei ahalik eta informazio osoena helarazteko. Alde bateko zein besteko iritziak biltzen saiatu gara". Adierazpen guztiak irakur daitezke Berriaren webgunean.