Eduki hau partekatzeko esteka arbelera kopiatu da.
Toribio Altzaga eta Gesalaga kaleetan herri lanak egiten ari da egunotan Zestoako Udala. Toribio Altzagan, Gisasola egoitzaren aurreko parkearen ondoko espaloian zeuden zuhaitzak kendu egin dituzte, eta espaloi osoa berrituko dute orain. Udalak azaldu duenez, zuhaitzen zuztarrek kalteak eragiten zituzten espaloian, zati batzuk oso hondatuta zeuden, eta horregatik erabaki dute arbolak kentzea eta oinezkoen bidea konpontzea.
Gesalaga kalean, berriz, aste honetan hasi dituzte hoditeriaren zati bat berritzeko lanak. Euri-urak jasotzeko hodiek arazoak eragiten zituztela eta ura pilatzen zela azaldu du udalak; hodi horiek zuzentzeko eta inguruko beste batzuk txukuntzeko baliatuko dituzte obrak.