Urrezko aizkolari eta Errota Harria harrijasotze txapelketak jokatu zituzten atzo, Iraetan

Urrezko Binakako Aizkolari eta Errota Harria harrijasotze txapelketak jokatu zituzten atzo, igandea, Iraetan. Santa Ines jaiak ari dira ospatzen auzoan, eta pilotalekuan aritu ziren aizkolariak eta harri-jasotzaileak lanean atzo arratsaldean, 18:30ean hasita. 100 lagun inguru bertaratu ziren lehiaz gozatzera, eta giro polita izan zen. Eusko Label Binakako Aizkolari Txapelketan, urrezko mailan, aritu ziren Aitzol Atutxa Atutxa II.a dimarra eta Julen Alberdi Txikia IV.a azkoitiarra, Eneko Otaño beizamarraren eta Juan Jose Azpilikueta lezaundarraren aurka. Sei izaeratako 24 enbor ebaki zituzten aizkolariek. Aitzol Atutxa eta Julen Alberdi nagusitu ziren, eta 18 minutu behar izan zituzten lanak bukatzeko, arerioek baino bi minutu eta 29 segundo gutxiago. Era berean, Errota Harri harrijasotze txapelketa ere jokatuko zuten atzoko jaialdian. Jokin Eizmendi, Imanol Albizu Goikoetxe, Xabier Peñagarikano, Beñat Telleria eta Inhar Urruzuno lehiatu ziren. Errota Harria hiru minutuko txanda bakarrean altxatu behar izan zuten, eta Peñagarikanok eskuratu zuen garaipena, 28 altxaldirekin. 27na altxaldi eman zizikioten Telleriak eta Urruzunok; Albizuk 26 aldiz jaso zuen Errota harria, eta Eizmendik 24 jasoaldi eman zizkion. Hona hemen atzoko txapelketako irudi batzuk (Argazkiak: Ibon Errazu): [flickr_set id="72157690874628831"]