Bertsotruk egitasmoan parte hartuko dute Erniarraitzek eta Zarauzko bertso eskolak

Erniarraitzekoak iaz Bertsotruk egitasmoko topaketa batean. (Erniarraitz) Joan den larunbatean, Bertso Eskolen Egunean, aurkeztu zuten Bertsotruk, bertso eskolen arteko desafioak biltzen dituen egitasmoa. Bertso eskolen arteko harremana sendotzeko bidean aurrera eginez, bertso eskolen arteko desafioak egingo dituzte aurten ere egitasmo horren barruan. Bertsotruk Euskal Herriko Bertso Eskolen Batzordeak antolatzen duen ekimena da, eta Euskal Herri osoko bertso eskolek parte hartuko dute bertan. Hirugarren edizioa izango da aurtengoa, eta, guztira, 21 taldek eman dute izena. Talde horiekin zortzi multzo osatu dituzte, eta bertso eskola bakoitzak bere multzoko beste eskolekin zehaztuko du desafioaren hitzordua eta formatua. Bertsotruk egitasmoan parte hartuko dute, besteak beste, Azkoitia, Azpeitia eta Zestoako Erniarraitz Bertsozale Elkarteak eta Zarauzko Motxian bertso eskolak. Honako hauek dira osatu dituzten multzoak: -Markina-Xemein eta Leitza/Lekunberri -Erniarraitz eta Sakana -Oñati eta Enkarterriak -Bortziriak, Durangaldea eta Lasarte-Oria -Barañain, Iruñea, Elorri eta Zarautz -Aramaio, Gernika-Lumo eta Irun -Gasteiz, Harituz eta Debagoiena -Mungia/Larrabetzu, Aitziaren gorraizia eta Mutriku