Zestoako IV. Argazki Rallya izango da bihar, eta izen-ematea zabalik da oraindik ere

Argazki Rallyaren IV. edizioa izango da bihar Zestoan, F11 argazki elkarteak antolatuta. Oraindik ere eman daiteke saiorako izena zestoa.argazki@gmail.com helbidera idatzita. Bihar ere inskribatzeko aukera izango du nahi duenak 09:00etatik 09:30era bitartean Zestoako Gurutze jubilatuen elkartearen tabernan. Izen-ematea bost euro ordaindu beharko da. Parte-hartzaileek memoria txartel huts bat eraman beharko dute, eta argazki oro Zestoan atera beharko dute zuri-beltzean edo koloretan, eta JPG formatuan. Antolatzaileek bost gai proposatuko dituzte rallyrako, eta bihar bertan jakinaraziko dituzte horiek. Rallya 13:00etan bukatuko da Gurutze tabernan, eta argazkiak antolatzaileen ordenagailuetan deskargatu beharko dituzte parte-hartzaileek. Gehienez, 36 argazki aurkeztu ahal izango dituzte txapelketara. Parte-hartzaile bakoitzak gai bakoitzari lotutako argazki bana bidali beharko du uztailaren 5a baino lehen zestoa.argazki@gmail.com helbidera, eta irudiak manipulatu gabe aurkeztu beharko dituzte. Epaimahaiak uztailean jakinaraziko ditu argazki sarituen egileen izenak, eta honako sari hauek banatuko dituzte: bilduma onenaren egileak garaikurra eta 100 euro jasoko ditu; bigarren bilduma onenaren egileak, garaikurra eta 75 euro; hirugarren onenaren egileak, garaikurra eta 60 euro; eta herriko lehen sailkatuak garaikurra eta 60 euro. Saritutako argazkiak F11 argazki elkartean esku geldituko dira, eta elkarteko kideek azaldu dutenez, rallyko argazki guztiekin erakusketa bat jartzeko asmoa dute.