Zestoako EH Bilduk ohar bidez azaldu duenez, Udal Gobernuak hil honetan egingo duen udalbatzarrean erabakiko du herrian hondakinak biltzeko sistema aldatzea; hala azaldu zien jeltzaleek azken ingurumen batzordean EH Bilduko ordezkariei. Beraz, gaur egun Zestoan indarrean dagoen sistema mistoa kendu, eta edukiontziak jartzea erabakiko luke hurrengo batzarrean EAJk.
Koalizio abertzalearen ustez, ez da bidezkoa «aurreko agintaldian alderdi politiko zein herriko eragileek era adostuan erabakitakoa dekretuz atzera bota eta berriz edukiontziak ezartzea». Azaldu dutenez, Urola Erdiko Mankomunitateko teknikariek egindako azken txostenek zera diote: «Zestoako bilketa komunitarioa da hondakinen kalitatea bermatzen duen sistema bakarra mankomunitateko herrien artean».
Urteko gaikako bilketaren batez bestekoa %74,5ekoa da gaur egun Zestoan. Zentzu horretan, «arriskua» ikusten du oposizioak edukiontzi bidezko sistemarekin birziklatze tasak behera egiteko.
Azkenik, gogorarazi du Zestoako EH Bilduk, 2015eko abenduaren 3an egindako udalbatzarrean onartu zela inolako aldaketarik egin aurretik Honda- kinen Mahaia biltzea: «Sei hilabete pasatu dira eta EAJren gobernuak ez du deialdirik egin oraindik».