Lasaoko bidegorriarentzat pasabidea errepide azpitik egiteko eskatu dute Azpeitiko eta Zestoako Udalek

Azpeitiko eta Zestoako udalek eskatu diote Gipuzkoako Foru Aldundiari Lasaoko bidegorriarentzat pasabidea lur azpitik egiteko. Izan ere, Azpeitia eta Zestoa lotzen dituzten bidegorri eta berdeak errepidea dute ibilbidearen erdian, eta horri irtenbide bat eman nahi diote. Erakundeek azaldu dutenez, aldundiak asmoa du bidegurutzea errepide gainetik egiteko, zebrabidea jarrita. Dena den, bi udalek uste dute horrek ez duela bermatzen "herritarren segurtasuna", autoak azkar joaten direlako gune horretan. Honakoa da bi udalek adostutako gutuna:

Iazko abuztuan, Azpetiko eta Zestoako udalok gutun bat bidali genion Foru Aldundiari, Lasaoko bidegorriaren inguruko arazoa konpontzeko eskatuz. Bidegorriaren lotunearen arazoa zaharra da, baino iazko udaberrian irekitako bide berdeak nabarmen areagotu zuen, eta horregatik jo genuen haiengana. Gutun horretan azaltzen genien pasabidea egiteko modu egokiena zela gaur egun dagoen errepide azpiko pasabidea txukundu eta egokitzea, oinez nahiz bizikletan pasatzen direnentzat segurtasun neurri batzuk hartuz. Bide horren zati bat Eusko Trenbideen Sarearen lurretatik pasatzen da, eta haiei ere bidali genien proposamena, teknikoki landuta. Aukera hori ez zutela egokia ikusten erantzun ziguten, batzuk zein besteek. Aldundiak aurten, 2016. urtean, irtenbidea aurkezteko eta egiteko konpromisoa hartu du. Baina azaldu dutenez (behin betiko proiektua ez dugu jaso) pasabidea errepide gainetik egitekoak dira, zebra bide bat jarrita, semafororik gabe.

Irtenbide horrek kezka sortzen digu, Lasao inguruetako herritarren eta bidegorriaren erabiltzaileen segurtasuna ez duelako bermatzen gure ustez. Errepide hori gure bailarako nagusia izanda, gaur egun autoak eta bestelako ibilgailuak 100 kilometro orduko inguruko abiaduran pasatzen dira, eta hori oinezko edo txirrindularien segurtasunarekin uztartzea zaila dela iruditzen zaigu.

Guk argi daukagu irtenbide egokiena beheko pasabidea egokitzearena dela; inbertsio txikiena eskatzen duen aukera da eta beharrezko neurriak hartuta, herritarren segurtasuna ondoen bermatzen duena. Horregatik, beste behin eskatzen diegu, bai Foru Aldundiari eta bai Eusko Trenbidearen Sareari, Azpeitia eta Zestoa arteko bidegorriaren lotura Lasao parean errepide azpiko pasabidetik egiteko.

Bitartean, denbora aurrera doa; sei hilabete pasatu dira hasieran aipatutako gutun hori bidali genuenetik, urte erdi, gune horretan dagoen arriskuaz ohartarazi genituenetik. Eta egoerak bere horretan jarraitzen du.

Herritarren segurtasuna bermatzea da lehentasuna eta instituziook ardura horri eutsi behar diogu. Gu, bi udalok, horretara beharrezko baliabide eta ahalegin guztiak jartzeko prest gaude. Beste sei hilabete ez daitezela pasatu.