Aurkezpena egin berri dute, eta tresna probatzen ari dira Zestoako eragileak. 41 taldek dute sarbidea egutegi bateratura; ondoren erabakiko dute agenda denen eskura jarri edo ez.
Egutegi bateratua prestatzen ari dira Zestoako eragileak, herrian agenda orekatua izan dezaten, ekitaldiekin elkar zapaldu gabe. Zestoako Udalak finantzatu eta sustatutako egitasmoa da, eta zenbait teknikari ari dira koordinazio lanetan, udalari aholkuak ematen dizkion informatika enpresa batekin batera.
Egutegiarekin lanean ari den langileetako bat da Nora Palmitano udaleko Euskara teknikaria. Hark azaldu duenez, hilero biltzen da Kultur taldeen topagunea, eta bilera horietan zehazten zuten, orain artean, egutegia: "Orain teknologia berriak aprobetxatuko ditugu. Taldeek aukera izango dute zerbait antolatutako unean bertan egutegi horretan jartzeko, eta gainonetzeko elkarteek ere ikusi egingo dute data horretan badela zerbait".
Oraindik tresna probatzen ari dira; eta, Palmitanok azaldu duenez, ikusi egin behar da eraginkorra eta erraza den taldeentzako. Dena den, eragileentzat soilik sortu dute euskarria, hasiera batean. Talde bakoitzak bere pasahitza du, eta dagoeneko aukera dute egutegia erabiltzeko. Behin martxa hartuta, ikusiko dute webgune horrek irekia izan behar ote duen edo ez.
Gaur gaurkoz, webgune bat sortu dute, bereziki, eginkizun horretarako. "Sarera, denen eskura, zabaldu aurretik ziurtatu nahi dugu ondo funtzionatzen duela, eta kudeatu dezakegula tresna", azaldu du. Webgunea sortzeko aplikazio libre bat erabili du Zestoako Udalak; beraz, hoosting-a soilik ordaindu dute, hau da, webgunea bera eta informazioa gordetzeko tokia.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide