Gipuzkoako Foru Aldundiko Gizarte Politikako diputatu Maite Peñak eta bere lantaldeak Zestoako San Juan egoitza bisitatu zuten joan den ostiralean. San Juan egoitzaren kudeaketa eredua ezagutzeko egin zuten bisita; izan ere, Zilarrezko Q kudeaketa aurreratuaren euskal saria jaso berri dute. Maite Peña diputatuak egoitzako langileak "zoriondu" zituen eta egiten duten lana tarteko.
Zestoako San Juan egoitzak bere plan estrategikoa dauka eta langileek bost taldetan antolatuta egiten dute lan. Egun, 36 egoilar bizi dira egoitzan. Eraikin berean dago eguneko zentroa ere. “Egoitza, eguneko zentroa eta zaintzapeko pisuak eraikin bakar batean egoteak, baliabideei etekin handiagoa ateratzea errazten du”, azaldu du Maite Peñak. Horrek erabiltzaileei "asko errazten die" batetik besterako pausoa, dio Peñak: "Hala, eguneko zentroan hasi eta zaintzapeko pisuetara pasatu daitezke erabiltzaileak, gerora adinekoen egoitzara iristeko”.
