Zestoako euskaltegiak indarberrituta hasi du 2015-2016 ikasturtea

Uxoa Arruti euskaltegiko kudeatzailea Kultur Etxeko bulego berrian (Eneritz Albizu Lizaso) Zestoako euskaltegi berriak atzo ireki zituen ateak. Udalak eta AEK-k sinatu berri dute hitzarmena eta bulego berria martxan jarrita hasi dute ikasturtea. Azken urteetako hitzarmena berritzeko epea iritsi zitzaion udalari, eta lehiaketako irabazlea AEK izan da; lehen ere bera arduratzen zen eskolak emateaz. Hitzarmen berriak berrikuntzak ekarri ditu, eta Kultur Etxean bulego berria izateaz gain, kudeatzaile propioa izango du euskaltegiak aurrerantzean. Uxoa Arruti da arduradun berria, eta Hitzari jakinarazi dio guztia martxan jartzen hasita daudela dagoeneko. Zestoa herriko jaien atarian dago eta, behin jaiak pasatutakoan, –irailaren 8a, asteartea, da azken eguna– zabalduko dute matrikulazio epea. 16 urtetik gorako herritarrei zuzendatutako ikastaroak dira, bai euskara ikasten hasiberriak direnei, bai maila altuagoa dutenei. Matrikulazio epea irailaren 24a arte dago zabalik, eta urrian hasiko dira eskolak. Euskara maila altua duten ikasleak autoikaskuntzara bideratuko dituzte, hau da, tutoretzen bidez astean behin elkartzen dira ikasleak, eta norberak lantzen du materiala. Tutoretza hauek mintza saioekin uztartzen dira, hizkuntza lantzeko. Printzipioz, maila guztiak ematen dira Zestoan.

Zubiak eraikitzea

Zestoako Udalaren nahia da euskaltegia "herriko eragile bat gehiago izatea". Hala azaldu du Nora Palmitano udaleko Hizkuntza Normalkuntzarako teknikariak. "Hiztun zaharren eta berrien arteko zubiak eraikitzea da gure asmoa", esan du; "askotan hiztun zaharrek ez dakite nor ari den euskara ikasten edo nor ari den esfortzu hori egiten, eta, hiztun berriak, berriz, ez dira ausartzen edo ez dituzte ikusten hizkuntzaren erabilerara jauzia egiteko aukerak". Beraz, euskaltegiaren bitartez zubi hori erakitzea dute erronka nagusia. Ikastaroez gain, beraz, bestelako ekimenak sortzeko asmoa dute, aurrerantzean gorpuzten joango direnak. Ikastaroen prezioari dagokionez, zestoarrentzat doakoa da euskara ikastea. 100 euroko matrikulazioa ordaintzen da hasieran eta %80ko asistentzia ziurtatzen dutenei osorik bueltatzen zaie ordaindutakoa. "Udalak %100 ordaintzen dizkie klaseak euskara ikasten dutenei", dio Zestoako Udaleko Hizkuntza Normalkuntzarako teknikariak.