Sarrerak salgai daude, eta Koiote tabernan eskura daitezke, sei euroren truke. Hiru antzezlan aurkeztuko dituzte herriko antzerki eskolako hiru taldek: bi komedia eta esperpento bat.
Zestoako antzerki eskolako kideak, azken entseguetan.
Zestoako Antzerki Astea ospatuko dute herrian, ekainaren 29tik uztailaren 4a bitartean. Hiru antzezlan prestatu dituzte aste horretarako, eta Zestoako antzerki eskolako hiru talderen artean eramango dituzte oholtzara. Sarrerak salgai daude dagoeneko Zestoako Koiote tabernan, eta komeni da ahalik eta azkarren erostea, antzerki eskolakoen arabera, aurreko urteetan abiada handian agortu baitira. Antzerki-saio bakoitza ikusteko txartelak sei euroko prezioa dauka.
Laugarren aldiz antolatu dute antzerki astea, baina aurtengoa da ziklo luzeena. Lehen urtean, 2012an, egun bateko jaia izan zen; eta bost egunekoa, hurrengo bi urteetan. Aurtengoan, aste osoko egitaraua prestatu dute.
Hiru talderen artean prestatu dituzte obrak, Amancay Gaztañagaren zuzendaritzapean. Ekainaren 29tik uztailaren 1era komediak izango dira ikugai Zestoako kultur etxean. Anton Chejoven Hartza interpretatuko dute Inma Izetak, Juan Alberto Gaztañagak eta Ekain Ibargurenek. Oscar Wilderen Ernesto izatearen garrantzia honakoek antzeztuko dute: Andrea Arrutik, Mikel Ibargurenek, Xanti Agirrezabalak, Arantxa Rezabalek, Maider Arsuagak, Edurne Errastik, Mirari Astorkiak, Ekain Ibargurenek eta Lorea Alberdik. Uztailaren 2tik 4ra, Lukurreria, Lizunkeria eta heriotzaren erretaula esperpentoa izango da ikusgai. Hauek dira aktoreak: Ainhoa Casina, Amaia Odriozola, Maialen Kortadi, Manolo Gaztañaga, Ruben Larrañaga, Estitxu Elduaien, Maria Blanco, Ane Uria, Lorea Alberdi, Leire Egaña, Ane Arenas, Mikel Ibarguren, Andrea Arruti eta Marije Izeta.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide