Zestoako Krosa dela eta, autobus geltokia lekuz aldatuko dute bihar

Zestoako Herri Krosa, iaz (Nerea Uranga) Ostegunean, San Jose Egunean, XXXVII. Herri Krosa egingo dute Zestoan, eta horren eraginez, Zumaia eta Donostiara aldeko autobus geltokia tokiz aldatuko da. Ohiko lekuan izan beharrean, Arteaga auzunean izango da. 10:00etan, gaztetxoen lasterketak hasiko dira, eta horiek egunean bertan eman beharko dute izena. Helduena, berriz, 11:30ean hasiko da, eta aurreko urteetan bezala, bi ibilbide izango ditu. Lasterketan aurrez izena emateko epea atzo amaitu zen, baina egunean bertan ere egin ahal izango da, hamar eurotan.  Helduen probaren aurretik korrika egingo duten gaztetxoek ez dute ordaindu behar.

Bira bat edo hiru Bi proba antolatu dituzte helduentzat, distantzia desberdinetakoak. 2.650 metro edo 8.567 metroren artean aukeratu ahal izango dute parte-hartzaileek, hau da, zehaztutako ibilbideari bira bat edo hiru bira emateko aukera izango dute. Junior mailako gazteek bira bat soilik egin dezakete; 2000 urtea baino lehen jaiotakoek, ordea, aukeratzeko modua izango dute. Haien aurretik, 10:00ak inguruan, gaztetxoen lasterketak jokatuko dira, eta adinaren arabera ibilbide desberdinak egingo dituzte. Sariei dagokienez, helduen lasterketetan, lehen bost sailkatuentzat eta lehen zestoarrarentzat egongo dira garaikurrak. Bestalde, parte hartzen duten guztientzat saria eta hamaiketakoa eskainiko dituzte, helmugan bertan, Zestoako udaletxearen azpian. Lasterketa guztiak plazan hasiko dira, eta leku berean bukatuko da ibilbidea. Antolatzaileek jakinarazi dutenez, herri barruan egingo da lasterketa, eta gune gehienak asfaltatuta egongo dira. Dutxa zerbitzua eskainiko dute parte-hartzaileentzat: emakumeentzat herriko eskolan prestatuko dute toki bat, eta gizonentzat, kiroldegian bertan.