Ekainberri egonkortutako proiektua dela azaldu du fundazioak, erreplikaren seigarren urteurrenean

Jaurlaritzako, Aldundiko eta Udaleko ordezkariak, Ekainberrin. (Eneritz Albizu Lizaso) Badira 46 urte Andoni Albizuri eta Rafael Rezabal azpeitiarrek Ekain kobazuloa eta bertako labar-margoak aurkitu zituztela. Hala ere, 2008an irekitu zuten Ekainberri erreplika, ondarea zaintzeko eta babesteko helburuarekin. Gaur egun, Ekainberri Fundazioak kudeatzen du proiektua, eta Zestoako Udalak, Gipuzkoako Aldundiak eta Eusko Jaurlaritzak osatzen dute elkartea. Ekainberrin bildu dira gaur erakundeetako ordezkariak, sei urteen balorazioa egin, eta erronka berriak ezartzeko asmoarekin. Garazi Lopez de Etxezarreta aldundiko Kultura zuzendariak azaldu du Ekainberri "erabat egonkortutako" proiektua dela, eta "zabalkunderako joera" duela ikusi dutela urtez urte. Hori azaltzeko, zenbait datu eman ditu; adibidez, azaldu du urtean, gutxi gorabehera, 28.000 bisita izaten dituela erreplikak, eta urtaro guztietan egoten dela erreplika bisitatzeko eskaria. Bisitari gehienak eskoletatik joaten direla esan du, %36 inguru; haien ostean, helduak gerturatzen dira gehien labar-artea ikustera, %30 inguru, Kultura zuzendariaren hitzetan. Horrez gain, Lopez de Etxezarretak nabarmendu du "erreplika bat baino gehiago" dela Ekainberri, eta hori erakusteko bertan egin daitezkeen zenbait ekintza aipatu ditu: Euskal Herriko labar-artearen erakusketa ikusi, Ekain Abentura deritzon egitasmoarekin, arkeologia esprimentala probatu; Audito Tour-arekin Sastarrain ingurua ezagutu edota bisita didaktikoetara joan. Hori dela-eta bihurtu da, Kultura zuzendariaren arabera, "erreferentziazkoa" Ekainberri, Gipuzkoako museoen artean, eta beraien erronka Euskal Herrian eta Europan ere tokia egitea da. Bestalde, jakinarazi du "proiektu jasagarria" dela fundazioak bideratzen duena, ingurumen aldetik eta ekonomikoki: "Hori oso positiboa eta garrantzitsua da guretzat, ingurumena zainduta eta herritarren parte-hartzearekin egiten dugu lana". Lili Jauregiaren biziberritzea Hain zuzen, zestoarrek lagundu dute, Ekainberrirekin batera, Lili Jauregia ere erreferentea izan dadin inguruetan. Lilitarrak ziren Zestoako eta inguruetako lurren, basoen eta erreka askoren jabeak, eta hamaika istorio gordetzen ditu eraikinak. Joan den urtean berritu eta jantzi zuten jauregia, eta herriko interpretazio eskolak bizia eman zion, antzerki bidez eginiko bisitekin. Leire Etxeberria Zestoako alkateak esan du lankidetza horrek "lotura estua" ekarri duela herritarren eta fundazioaren artean. Izan ere, Ekainberri Fundazioak, erreplikaz gain, "bailarako altxorrak" ezagutaraztea nahi luke. Orain, beste obra bat ari dira prestatzen antzezleak Lilirako, eta Aste Santua baino lehen hasiko dira martxan. Fideltasuna oinarri "Fideltasuna da gure oinarria, erreplikara sartzerkoan, kobazuloan bizi daitezkeen emozioak sorraraztea nahi dugu", azaldu du Imanol Agote Eusko Jaurlaritzako Kultura Ondarearen zuzendariak. Hark esan du lortu dutela "bisita libre eta irekia" egitea Zestoan, "kalitatezko zerbitzuarekin". "Kulturan interesatuta dagoen jendea hona ekartzeko lana egin behar dugu, eta Danbolinzulorekin ere eskaintza integrala eskaintzea izango dugu xede", adierazi du. Haren hitzetan, ez dira "mugatzen" Ekainberri erreplikara soilik, eta esan du Jaurlaritzako museoen erroldan sartzeko eskaera egin duela fundazioak, eta hemendik aurrera "elkarlan sendoagoa" izango dutela, "baita ekonomikoki ere".